ഉപമുഖ്യമന്ത്രി സ്ഥാനത്തേക്ക് ഉദയനിധി സ്റ്റാലിന് സ്ഥാനക്കയറ്റം?; ഡിഎംകെ നേതാവ് സൂചന നൽകി
തമിഴ്‌നാട് മുഖ്യമന്ത്രി എംകെ സ്റ്റാലിൻ്റെ മകൻ ഉദയനിധി സ്റ്റാലിനെ സംസ്ഥാന ഉപമുഖ്യമന്ത്രി സ്ഥാനത്തേക്ക് ഉയർത്തണമെന്ന് ഡിഎംകെ നേതാവ്. പാർട്ടി പ്രവർത്തകരും നേതാക്കളും ഉദയനിധിയുടെ സ്ഥാനക്കയറ്റമാണ് ആഗ്രഹിക്കുന്നതെന്ന് ഡിഎംകെ ഓർഗനൈസിംഗ് സെക്രട്ടറി ആർ എസ് ഭാരതി പറഞ്ഞു.
എന്നാൽ പാർട്ടി അധ്യക്ഷനും മുഖ്യമന്ത്രിയുമായ എംകെ സ്റ്റാലിൻ ഇക്കാര്യത്തിൽ അന്തിമ തീരുമാനം എടുക്കുമെന്ന് അദ്ദേഹം വ്യക്തമാക്കി. ഉദയനിധിയെ ഉയർത്തിയാൽ അത് 2026ലെ തമിഴ്‌നാട് നിയമസഭാ തിരഞ്ഞെടുപ്പിൽ പാർട്ടിക്ക് വലിയ നേട്ടമായി മാറുമെന്നും അദ്ദേഹം പറഞ്ഞു. അടുത്തയാഴ്ച മുഖ്യമന്ത്രിയുടെ അമേരിക്കൻ സന്ദർശനത്തിന് മുന്നോടിയായി ഉദയനിധി സ്റ്റാലിനെ സർക്കാരിലെ നിർണായക സ്ഥാനത്തേക്ക് ഉയർത്തുമെന്ന അഭ്യൂഹങ്ങൾക്കിടയിലാണ് ഈ പരാമർശം.
നിലവിൽ സംസ്ഥാന കായിക മന്ത്രിയാണ് ഉദയനിധി സ്റ്റാലിൻ . ചെപ്പോക്ക്-തിരുവല്ലിക്കേനി നിയമസഭാ മണ്ഡലത്തിൽ നിന്ന് തെരഞ്ഞെടുപ്പിൽ വിജയിച്ച് ഒരു വർഷത്തിനുശേഷം 2022-ൽ എംകെ സ്റ്റാലിൻ്റെ മന്ത്രിസഭയിൽ അദ്ദേഹത്തെ ഉൾപ്പെടുത്തി. സ്റ്റാലിൻ്റെ സ്ഥാനക്കയറ്റത്തെക്കുറിച്ചുള്ള റിപ്പോർട്ടുകളെ കുറിച്ച് ചോദിച്ചപ്പോൾ, “മന്ത്രി ഉദയനിധി സ്റ്റാലിനെ ഉപമുഖ്യമന്ത്രിയായി ഉയർത്തുന്നത് സംബന്ധിച്ച് മുഖ്യമന്ത്രി എംകെ സ്റ്റാലിനാണ് തീരുമാനിക്കേണ്ടത്. അത് സംഭവിക്കുമ്പോൾ പ്രഖ്യാപിക്കും” എന്ന് ഭാരതി പറഞ്ഞു.
ഇത് ഞങ്ങളുടെയും അഭിലാഷമാണ്, എന്നാൽ പാർട്ടി അധ്യക്ഷൻ എന്ന നിലയിൽ ആത്യന്തികമായി മുഖ്യമന്ത്രിയാണ് തീരുമാനിക്കേണ്ടതെന്നും അദ്ദേഹം കൂട്ടിച്ചേർത്തു.
