എന്റെ വസതിയാണിത്; വിശ്വഭാരതി സർവകലാശാല എന്നെ പുറത്താക്കാൻ ശ്രമിക്കുന്നു: അമർത്യ സെൻ

ശാന്തിനികേതനിലെ അനധികൃതമായി താൻ കൈവശം വച്ചിരുന്നതായി ആരോപിക്കപ്പെടുന്ന ഒരു പ്ലോട്ടിന്റെ ഭാഗങ്ങൾ കൈമാറാൻ ആവശ്യപ്പെട്ടതിന് വിശ്വഭാരതിക്കെതിരെ ആഞ്ഞടിച്ച് നൊബേൽ സമ്മാന ജേതാവ് അമർത്യ സെൻ . എന്തുകൊണ്ടാണ് കേന്ദ്ര സർവ്വകലാശാല പെട്ടെന്ന് ഇത്ര സജീവമായത് എന്ന് തനിക്ക് മനസ്സിലാകുന്നില്ലെന്ന് അദ്ദേഹം പറഞ്ഞു. ശാന്തിനികേതനിലെ തന്റെ കൈവശമുള്ള ഭൂരിഭാഗം ഭൂമിയും 1940 കളിൽ അച്ഛൻ മാർക്കറ്റിൽ നിന്ന് വാങ്ങിയതാണെന്നും മറ്റ് ചില പ്ലോട്ടുകൾ പാട്ടത്തിനെടുത്തതാണെന്നും പ്രശസ്ത സാമ്പത്തിക വിദഗ്ധൻ തറപ്പിച്ചുപറഞ്ഞു.

“അവരുടെ (സർവകലാശാലാ അധികാരികളുടെ) ചിന്തകളിൽ എനിക്ക് ഒരു സൂക്ഷ്മതയും കാണാൻ കഴിഞ്ഞില്ല. വിശ്വഭാരതി സർവ്വകലാശാലയുടെ ഈ നിലപാടിന് പിന്നിലെ രാഷ്ട്രീയവും എനിക്ക് മനസ്സിലാകുന്നില്ല. 1940-കളിൽ വിശ്വഭാരതിയിൽ നിന്ന് പാട്ടത്തിനെടുത്ത ഭൂമിയിൽ പണിത എന്റെ വസതിയാണിത്. ഈ സ്ഥലം 100 വർഷത്തേക്ക് ഞങ്ങൾക്ക് പാട്ടത്തിന് നൽകിയതാണ്. കുറച്ച് സ്ഥലവും എല്ലാ നിയമങ്ങളും ചട്ടങ്ങളും പാലിച്ച് അച്ഛൻ മാർക്കറ്റിൽ നിന്ന് വാങ്ങിയതാണ്. ”പ്രൊഫ സെൻ പിടിഐയോട് പറഞ്ഞു.

സമീപത്തെ സുരുളിലെ ജമീന്ദാർമാരിൽ നിന്നാണ് പ്ലോട്ടുകൾ വാങ്ങിയതെന്നും ഇടപാടുമായി ബന്ധപ്പെട്ട ആവശ്യമായ രേഖകൾ (സർക്കാർ) അധികാരികൾക്ക് സമർപ്പിച്ചിട്ടുണ്ടെന്നും സാമ്പത്തിക വിദഗ്ധൻ പറഞ്ഞു. “ഈ വിഷയത്തിൽ എന്റെ സമയം കളയാൻ ഒരു കാരണവും ഞാൻ കാണുന്നില്ല. വിശ്വഭാരതി പെട്ടെന്ന് എന്നെ പുറത്താക്കാനുള്ള ശ്രമത്തിൽ സജീവമായത് എന്തുകൊണ്ടാണെന്ന് മനസിലാക്കാൻ വളരെ ബുദ്ധിമുട്ടാണ്,” അദ്ദേഹം പറഞ്ഞു.

അതേസമയം, ശാന്തിനികേതനിലെ ഒരു സ്ഥലം അനധികൃതമായി കൈവശം വച്ചിരിക്കുകയാണെന്ന് അവകാശപ്പെട്ട് അതിന്റെ ഭാഗങ്ങൾ കൈമാറാൻ വിശ്വഭാരതി ചൊവ്വാഴ്ച അമർത്യ സെന്നിനോട് ആവശ്യപ്പെട്ടു. വിശ്വഭാരതിയുടെ 13 ദശാംശ ഭൂമിയിൽ നിങ്ങൾ അനധികൃതമായി കൈവശം വച്ചിരിക്കുകയാണെന്ന് രേഖകളിൽ നിന്നും ഫിസിക്കൽ സർവേ / അതിർത്തി നിർണയത്തിൽ നിന്നും കണ്ടെത്തിയതായി സർവകലാശാല ഡെപ്യൂട്ടി രജിസ്ട്രാർ അമർത്യ സെന്നിന് ഒപ്പിട്ട കത്തിൽ പറയുന്നു.

2021 ജനുവരിയിൽ വിശ്വഭാരതി വൈസ് ചാൻസലർ ബിദ്യുത് ചക്രവർത്തി അമർത്യ സെന്നിന്റെ കുടുംബം കാമ്പസിൽ അനധികൃതമായി ഭൂമി കൈവശം വച്ചിരിക്കുകയാണെന്ന് ആരോപിച്ചിരുന്നു. കേന്ദ്രസർക്കാരിന്റെ പല നയങ്ങളെയും സെൻ വിമർശിച്ചിട്ടുള്ളതിനാൽ സർവകലാശാലയുടെ നടപടികൾ രാഷ്ട്രീയ പ്രേരിതമാകുമെന്ന് ചില കോണുകളിൽ നിന്ന് ആക്ഷേപമുണ്ട്.