പരാതി ശ്രദ്ധയിൽപ്പെട്ടിട്ടുണ്ട്; എൽദോസ് കുന്നപ്പള്ളിക്കെതിരെ ഉചിതമായ നടപടി സ്വീകരിക്കും: വി ഡി സതീശൻ

എൽദോസ് കുന്നപ്പള്ളി എം എൽ എയ്ക്കെതിരെ പോലീസിൽ യുവതി നൽകിയ പരാതിയിൽ നടപടിക്കൊരുങ്ങി കോൺഗ്രസ് സംസ്ഥാന നേതൃത്വം. യുവതിയുടെ പീഡന പരാതി ശ്രദ്ധയിൽപ്പെട്ടിട്ടുണ്ടെന്നും ഉചിതമായ നടപടി സ്വീകരിക്കുമെന്നും പ്രതിപക്ഷ നേതാവ് വി ഡി സതീശൻ പറഞ്ഞു.

പാർട്ടി സ്ത്രീ വിരുദ്ധ നടപടികൾ ഒരു തരത്തിലും വച്ച് പൊറുപ്പിക്കില്ലെന്നും കെപിസിസി പ്രസിഡന്റ് തുടർ നടപടികൾ വ്യക്തമാക്കുമെന്നും അദ്ദേഹം മാധ്യമങ്ങളോട് സംസാരിക്കവെ കൂട്ടിചേർത്തു. അതേസമയം ഇന്ന് പോലീസിൽ എൽദോസ് കുന്നപ്പിള്ളിക്കെതിരെ മൊഴി നൽകാനെത്തിയ പരാതിക്കാരി കുഴഞ്ഞു വീണു. ഉടൻതന്നെ യുവതിയെ ആശുപത്രിയിലേക്ക് മാറ്റി. കോവളം പോലീസ് സ്റ്റേഷനിലാണ് യുവതി മൊഴി നൽകാൻ എത്തിയത്.താൻ പരാതിയിൽ ഉറച്ചുനിൽക്കുന്നുവെന്ന് കഴിഞ്ഞ ദിവസം വഞ്ചിയൂർ പൊലീസിനും മജിസ്‌ട്രേറ്റിനും യുവതി മൊഴി നൽകിയിരുന്നു.